Art
464
—
468
464
ಸ್ರವಿಸುವುದು ಜೀವರಸ ಹೃದಯಗರ್ತದ ತಳದಿ ।
ಕಿವಿಗಾ ರಹಸ್ಯದಲಿ ಕಾವ್ಯಗಾನಗಳಿಂ ॥
ಭುವನದಾಚಿನ ರಹಸ್ಯದ ಕೀರ್ತಿ ವೇದಗಳ ।
ರವದಿನೆಂದಾರ್ಷಮತ - ಮಂಕುತಿಮ್ಮ ॥ ೪೬೪ ॥
ಕಾವ್ಯವೋ, ಕವನವೋ,ಗಾಯನವೋ ಅಥವಾ ಯಾವುದಾದರೂ ಒಂದು ವಾದ್ಯದ ಸಂಗೀತವೋ ನಾವು ಏಕಾಂತದಲ್ಲಿದ್ದಾಗ ನಮ್ಮ ಕಿವಿಗಳಿಗೆ ಬಿದ್ದರೆ ನಮ್ಮ ಹೃದಯಗಳಿಂದ ಜೀವರಸ ಒಸರುತ್ತದೆ. ಇದು ಈ ಜಗತ್ತಿನ ವಿಷಯವಾದರೆ, ಈ ಭೂಮಿಯಿಂದಾಚಿನ ಜ್ಞಾನವು, ರಹಸ್ಯವಾಗಿ ವೇದಗಳಾಗಿ ಶಬ್ದರೂಪದಿ ನಮಗೆ ಇಳಿದುಬಂದಿದೆ ಎನ್ನುವುದು ಋಷಿಗಳ ಅಭಿಮತ ಎಂದು ಉಲ್ಲೇಖಮಾಡಿದ್ದಾರೆ ಮಾನ್ಯ ಗುಂಡಪ್ಪನವರು ಈ ಮುಕ್ತಕದಲ್ಲಿ.
The essence of life flows as emotions in the bottom of every heart. Poets listen (and hear) this secret that comes out as poems and songs. Similarly, it is the sages opinion that the truth beyond this world comes to as the Vedas - Mankutimma
465
ಸ್ವರರಾಗಗೀತಿಗಳು ನಾಟ್ಯಾಭಿನೀತಿಗಳು ।
ಕರೆದೇಳಿಸುವುವು ಮನಸಿನಲಿ ನಿದ್ರಿಸುವಾ ॥
ಪರಿಪರಿಯ ಭಾವಗಳ ಗೂಢಸ್ವಭಾವಗಳ ।
ಪರಮೇಷ್ಠಿ ಟೀಕು ಕಲೆ - ಮಂಕುತಿಮ್ಮ ॥ ೪೬೫ ॥
ಸುಮ್ಮನಿರುವ ಅಥವಾ ಶಾಂತವಾಗಿರುವ ಮನಸ್ಸನ್ನು ಕರೆದು ಎಬ್ಬಿಸಿ ಸ್ವರ ರಾಗ ಗೀತೆಗಳ ಕೇಳುವ ಮತ್ತು ಕೇಳಿ ಆನಂದಿಸುವ, ನಾಟ್ಯ, ಅಭಿನಯ ಮುಂತಾದವುಗಳ ನೋಡುವ ಮತ್ತು ಹಾಗೆ ಕೇಳಿ ನೋಡಿದ್ದನ್ನು ಪರಿಪರಿಯಾಗಿ ಆನಂದಿಸುವ ಮಾನವನ ಹಲವಾರು ಗುಪ್ತ ಮತ್ತು ಸುಪ್ತ ಭಾವಗಳು ಆ ಪರಮಾತ್ಮನ ಸೃಷ್ಟಿಯನ್ನೇ ಟೀಕಿಸುವ ಅಥವಾ ಅಣಕವಾಡುವ ಕಲೆಯಂತೆ ಇದೆ ಎಂದು ಉಲ್ಲೇಖಮಾಡಿದ್ದಾರೆ ಮಾನ್ಯ ಗುಂಡಪ್ಪನವರು ಈ ಮುಕ್ತಕದಲ್ಲಿ.
Melodious songs, drama and fabulous acting can trigger emotions and innate urges that are asleep deep in our mind. Fine arts is imitating God. - Mankutimma
466
ವ್ಯಸನಕಾರಣವೊಂದು ಹಸನಕಾರಣಾವೊಂದು ।
ರಸಗಳೀಯೆರಡಕಿಂತಾಳವಿನ್ನೊಂದು ॥
ಭೃತವಿಶ್ವಜೀವಿತಗಭೀರತೆಯ ದರ್ಶನದ ।
ರಸವದದ್ಭುತಮೌನ - ಮಂಕುತಿಮ್ಮ ॥ ೪೬೬ ॥
ಈ ಜಗತ್ತಿನ ಸೌಂದರ್ಯಗಳು, ಕೆಲವರಿಗೆ ವ್ಯಸನಕ್ಕೆ ಕಾರಣವಾದರೆ,ಮತ್ತೆ ಕೆಲವು ಹರುಷಕ್ಕೆ ಕಾರಣವಾಗುತ್ತವೆ. ಆದರೆ ಈ ಎರಡೂ ರಸಗಳಿಗಿಂತ ಆಳವಾದ ಇನ್ನೊಂದು ಅನುಭವವಿದೆ. ಈ ವಿಶ್ವದ ಗಂಭೀರತೆಯ ವಿಚಿತ್ರವನ್ನು ನೋಡಿದರೆ ಮನದಲ್ಲಿ ಒಂದು ಗಾಢ ಮೌನ ಆವರಿಸುತ್ತದೆ. ಈ ಮೌನ ರಸದ ಅನುಭವ ಬಹಳ ಅದ್ಭುತ ಎಂದು ಪ್ರಕೃತಿ ಸೌಂದರ್ಯವನ್ನು ಅನುಭವಿಸುವಲ್ಲಿ ಮಾನವನ ಚಿತ್ರ ವಿಚಿತ್ರವಾದ ಪ್ರತಿಕ್ರಿಯೆಯ ಬಗ್ಗೆ ನಮಗೆ ವಿವರಿಸಿದ್ದಾರೆ ಅ ಮಾನ್ಯ ಗುಂಡಪ್ಪನವರು ಈ ಮುಕ್ತಕದಲ್ಲಿ.
Everyday emotions are of two types – that which make us happy (laugh) or make us sad (cry). But there is one which is different from the two. It is the vision of this strange universe and the secret of life. That emotion is nothing but wonderful silence. - Mankutimma
467
ಗಣನೆಗೆಟುಕದ ಗುಣಗಳಾತ್ಮದವವರ್ಣ್ಯಗಳು ।
ಮನದ ದೇಹದ ಜೀವದೆಲ್ಲ ಕರಣಗಳಾ ॥
ಅನುಭವದ ಮುಕರದೊಳ್ ಪ್ರತಿಫಲಿಸೆ ತನ್ನದೊಂ - ।
ದಣುವದುವೆ ಸುಂದರವೊ - ಮಂಕುತಿಮ್ಮ ॥ ೪೬೭ ॥
ವರ್ಣಿಸಲು ಆಗದ ಮತ್ತು ಎಣಿಸಲು ಆಗದ ಆತ್ಮದ ಗುಣಗಳು ಮನಸ್ಸಿನ, ದೇಹದ, ಜೀವದ ಇಂದ್ರಿಯಗಳಿಂದ ಪಡೆದ ಅನುಭವಗಳನ್ನು ಮತ್ತು ಅದರಿಂದ ಪಡೆದ ಆನಂದವನ್ನು ಕನ್ನಡಿಯಂತಹ ಮುಖದ ಮೂಲಕ ಪ್ರತಿಫಲಿಸಿದಾಗ ಆ ಅನುಭವದ ಸೌಂದರ್ಯ ಇನ್ನೂ ಹೆಚ್ಚಾಗುತ್ತದೆ ಎಂದು ಉಲ್ಲೇಖಮಾಡಿದ್ದಾರೆ ಮಾನ್ಯ ಗುಂಡಪ್ಪನವರು.
The qualities of the soul are innumerable, immeasurable and indescribable. They can only be experienced. It is reflected in what we do using our mind, body and life. When we see that, we realize that every atom is beautiful. - Mankutimma
468
ಲಾವಣ್ಯವಾತ್ಮಗುಣವದರಿಂದೆ ಲೋಕಜನ ।
ದೇವನನು ಕಮನೀಯ ವಿಗ್ರಹಂಗಳಲಿ ॥
ಭಾವಿಸುತ ತಮ್ಮಿಷ್ಟಭೋಗಗಳನರ್ಪಿಸುವ ।
ಸೇವೆಯಿಂ ನಲಿಯುವರು - ಮಂಕುತಿಮ್ಮ ॥ ೪೬೮ ॥
ಆತ್ಮದ ಗುಣ ಬಹಳ ಸುಂದರ. ಇಂತಹ ಸುಂದರ ಭಾವದಿಂದ ಸುಂದರ ವಿಗ್ರಹಗಳಲ್ಲಿ ಆ ಪರಮಾತ್ಮನನ್ನು ಭಾವಿಸುತ್ತಾ, ಆ ಪರಮಾತ್ಮನಿಗೆ ತಮಗಿಷ್ಟವಾದ ಪದಾರ್ಥಗಳನ್ನು ನೈವೇದ್ಯವಾಗಿ ಅರ್ಪಿಸುವ ಸೇವೆಯನ್ನು ಮಾಡುತ್ತಾ, ಲೋಕದ ಜನರು ನಲಿಯುತ್ತಾರೆ ಎಂದು ಉಲ್ಲೇಖಮಾಡಿದ್ದಾರೆ, ಮಾನ್ಯ ಗುಂಡಪ್ಪನವರು ಈ ಮುಕ್ತಕದಲ್ಲಿ.
Beauty is the natural quality of the soul. It is perhaps why people of the world imagine Gods to be in beautiful form (idols). They become happy by offering all the worldly items that they like to Gods. - Mankutimma